FORMACIÓN

Cada un dos concellos que forman a Mancomunidade presenta unha oferta hostaleira de crecente calidade e é patente a necesidade de ofrecer unha formación específica ás persoas que buscan emprego, de maneira que teñan facilidade de acceso e maior inserción a medio e longo prazo. Deste xeito, xa no ano 2004, xurdíu a iniciativa de sumarse ás Escolas-Obradoiro impulsando dúas edicións con tres modalidades: formación en sala, cociña e pisos.

No ano 2008 a Mancomunidade apostou polo modelo de Obradoiro de Emprego, no que o alumnado é ó mesmo tempo traballador, de xeito que sae con formación e experiencia.

Neste ano estase a desenvolver a XI edición dos Obradoiros de Emprego, na que os alumnos traballadores cursan os estudos conducentes aos Certificados de Profesionalidade de nivel II de Operacións básicas de Cociña e Servizos de Restaurante-Bar.

Ambos son complementarios e, de feito, a parte práctica do currículo lévase a cabo de xeito coordinado, o que enriquece a experiencia de aprendizaxe.

Ao obter os Certificados de Profesionalidade, o alumnado traballador recibe unha titulación recoñecida, acreditada e avalada polo Servizo Público de Emprego (SEPE), xunto coa Administración Laboral da Xunta de Galicia. Os certificados outorgan o recoñecemento de determinadas competencias e teñen validez europea, o que facilita a inserción laboral e a mobilidade. Cada Certificado de Profesionalidad identifica e acredita unha cualificación dentro do Sistema Nacional de Acreditacións e Formación Profesional.

Ao mesmo tempo que recibe formación e adquire experiencia, o alumnado conta con asesoramento didáctico e información profesional e empresarial. A isto súmanse as formacións complementarias de Prevención de Riscos Laborais, Manipulación de Alimentos, así como as transversais de Igualdade, Informática e Orientación Laboral.

Desde a súa primeira edición ata a actual, lévase ofrecido a oportunidade de adquirir formación e acceder ao emprego a máis de 400 persoas.